Россиялик журналист Қозоғистонга тош отди
Россиялик пропагандачи журналист Тина Канделаки қозоғистонликларни манқуртга ўхшатди.
Ҳаммаси Қозоғистондаги бир қатор темир йўл станцияларининг русча номи қозоқчага ўзгартирилиши ҳақидаги қарордан бошланди. Ушбу ташаббусга қарши чиққан Т.Канделаки Қозоғистонда рус тилини сиқиб чиқаришга уриниш бўлаётганини иддао қилиб пост чоп этди.
Табиийки, россиялик журналистнинг ақл ўргатиши ва мамлакат ички ишларига аралашиши Қозоғистон жамоатчилигининг кескин эътирозига сабаб бўлди.
Реклама на Unews
«Биринчидан, биз суверен мустақил давлатмиз. Бинобарин, темир йўл станцияларига қандай ном беришни ўзимиз ҳал қиламиз. Иккинчидан, Қозоғистонда мустақиллик йилларида совет даврида поймол этилган она тилимизнинг мақоми босқичма-босқич қайтарилмоқда. Учинчидан, мамлакатимизда рус тили расман қозоқ тили билан баравар ишлатилмоқда, қозоқча эса давлат тилидир», – дея муносабат билдирди журналист ва блогер Динара Сатжан.
Шунда ҳам ақлини йиғмаган Канделаки яна қозоғистонликлар шаънига номақбул сўзлар ёзди.
«Ҳурматли қозоқлар, сизларда «мәңгу» деган ихчам, аммо сермазмун атама бор. Хотираси, ўзлиги ва ҳатто ақлини йўқотган инсон – манқурт образининг илдизи ҳам шунга бориб тақалади. Ўзини ва ҳодисаларни унутиш, тарихни четга суриш, жумладан, тарихий номларни ўзгартириш нафақат чаласаводлик, балки хавфли машғулот ҳамдир», – дея билағонлик қилди у.
Реклама на Unews
2022 йил январь ойида рўй берган оммавий норозиликлар пайти Қозоғистонга КХШТ қўшини киритилган эди. Ушбу ҳодисани эслаган Тина Канделаки даъвосича, агар қўшнилар (Россия деб ўқинг!) ёрдам бермаганида, Қозоғистон давлати парокандаликка юз тутар эди.
«Ёнаётган шаҳарлар яхшими ёк кўмакка келган қўшниларми?» – деб ёзғиради Т.Канделаки.
Маълумот ўрнида, Россиянинг Украинага босқинини тарғиб-ташвиқ қилгани сабабли Т.Канделакига нисбатан АҚШ ва Канада томонидан санкция жорий этилган.
Россиялик айрим сиёсатдонларнинг Қозоғистонга «катта оғалик» руҳида даъволар билан чиқиши янгилик эмас.
2022 йилда Кремль пропагандасининг яловбардорларидан саналган журналист Тигран Кеосаяннинг Қозоғистонга кириши тақиқланди. Украина урушини тиш-тирноғи билан ҳимоя қилиб келаётган Кеосаян YouTube каналида Қозоғистон шаънига номақбул сўзлар айтган ва пўписа қилган.
2020 йил декабрь ойида Россия Давлат думасининг илм-фан ва таълим қўмитаси раиси Вячеслав Никонов 1-телеканалда «Қозоғистон ҳудуди Россия ҳамда Совет иттифоқи томонидан берилган катта совғадир» деган даъво билан чиққан.
2021 йилнинг январида Қозоғистон президенти Қосим-Жўмарт Тўқаев «Egemen Qazaqstan» газетасида чоп этилган мақоласида Россия юқори сиёсий доираларида бот-бот янграётган ҳудудий даъволарга муносабат билдирган.
Икки йил аввал Қозоғистонда оммавий норозилик намойишлари бошланган кунларда ҳам бир гуруҳ россиялик депутатлар яна қўшни мамлакат ҳудудий яхлитлигига таҳдид солувчи баёнотлар берганди.
Eng qaynoq xabarlar bilan TELEGRAM kanalda birinchilarda xabardor bo'ling.
