Kiyev sudi "Motor Sich" aviakorxonasi rahbarini ikki oyga hibsga oldi

1181 25-10-2022 0 Dunyo

Vyacheslav Boguslayev kollaboratsionizmga aloqadorlikda ayblanib, 60 sutkaga hibsga olingan. Xuddi shunday ehtiyot chorasi Zaporijjya korxonasi bo‘limlaridan birining boshlig‘i uchun ham tanlangan.

Kiyevning Shevchenko tuman sudi "Motor Sich" aviakompaniyasi rahbari Vyacheslav Boguslayevni ikki oyga hibsga oldi. Hibsga olish to‘g‘risidagi so‘rov Ukraina Xavfsizlik xizmati va Bosh prokuratura tomonidan berilgan, deb xabar qildi UXX matbuot xizmati 24 oktabr, dushanba kuni.

"Keyingi 60 kun ichida UXX tergovchilari tergovga qadar tekshiruv o‘tkazayotgan bir paytda u hibsxonani tark eta olmaydi", — deyiladi mahkamaning Telegram-kanalida. Xuddi shunday ehtiyot chorasi "Motor Sich" tashqi iqtisodiy faoliyat bo‘limi boshlig‘i Oleg Dzyubaga nisbatan ham tanlangan, u ham avvalroq UXX tomonidan hibsga olingan.

Hibsga olinganlar tajovuzkor davlat bilan hamkorlikda va sheriklikda gumon qilinmoqda. "Sudga qadar tergov davom etmoqda. UXX tomonidan noqonuniy faoliyatning boshqa ishtirokchilarini aniqlash va aybdorlarni javobgarlikka tortish bo‘yicha kompleks chora-tadbirlar ko‘rilmoqda", - deyiladi xabarda.

Sud majlisi yopiq eshiklar ortida o‘tdi. Uchrashuvdan so‘ng Boguslayev sud qaroridan qoniqish hosil qilganini aytdi, biroq ayni paytda ishni "tushunmovchilik" deb atadi.

Boguslayevning advokati Yaroslav Volines himoyasi ostidagi shaxsning Rossiya fuqaroligi borligi haqida avvalroq ommaviy axborot vositalarida tarqalgan ma’lumotni tasdiqladi.

83 yoshli Boguslayevning Zaporijjya shahrida hibsga olingani 22 oktabr kuni kechqurun ma’lum bo‘ldi. Ertasi kuni buni Ukraina Xavfsizlik xizmati rasman tasdiqladi. Dushanba kuni ertalab UXX "Motor Sich" rahbarining telefon suhbatlari audioyozuvlarini e’lon qildi.

Yozuvlardan ma’lum bo‘lishicha, Rossiyaning Ukrainaga hujumidan keyin ham Boguslayev Rossiya jangovar vertolyotlariga dvigatellar va boshqa butlovchi qismlar yetkazib berishda davom etgan va shu tariqa Rossiya Qurolli kuchlarini amalda qo‘llab-quvvatlab, ularga Ukraina shahar va qishloqlarini o‘qqa tutishda yordam bergan, deyiladi agentlik xabarida. UXX Boguslayev bir necha bor Oliy radaga "Hududlar partiyasi"dan saylanganini va Rossiya bosqinini oqlaganini eslatdi.

Boguslayev 1990-yillarning boshidan beri "Motor Sich"ni boshqarib keladi. 2012 yilda u o‘z lavozimini tark etib, Oliy rada deputati bo‘ldi, keyin 2019 yilda lavozimga qaytdi. 2021 yilda u 125 million dollar boyligi bilan Ukraina Forbes ro‘yxatida 62-o‘rinni egalladi. 2000 yilda Boguslayevga Ukraina Qahramoni unvoni berilgan.