Италияда ИШИДга алоқадор тожикистонлик эркак ҳибсга олинди (видео)
Италия полицияси Римда “Ислом давлати” террорчилик гуруҳининг Тожикистон фуқароси бўлган аъзосини қўлга олди. Бу ҳақда ANSA агентлиги хабар берди.
Рим полицияси бош бошқармасига кўра, 32 ёшли Илҳоми Сайраҳмонзода Нидерландиянинг Эйндховен шаҳридан учиб келган самолётда Фюмичино аэропортида қўлга олинган. У 2014 йилда Суриядаги жангларда қатнашгани учун Тожикистон томонидан халқаро қидирувга берилган.
Таъкидланишича “у террорчилик ташкилотнинг фаол аъзоси бўлиб, турли тахаллуслар ва туғилган саналари орқали ўзини Ўзбекистон, Қирғизистон ёки Украина фуқароси сифатида кўрсатиб, ҳуқуқ-тартибот идораларидан яширинган”.
"Эркак соат 11:45 да Фюмичинога қўнди, у Эйндховендан сохта гувоҳнома билан келган. Полиция унинг бармоқ изларини олди ва у Тожикистон талабига биноан Интерпол томонидан қидирилаётган шахслиги аниқланди. Эркакнинг аэропортдаги ҳаракати, уни кимдир кутаётганини билиш учун кузатилди. Аммо у Римга олиб борувчи поезд томон ёлғиз ҳаракатланганда офицерлар жараёнга аралашди. Ундан мобил телефон ва икки минг еврога яқин нақд пул олиб қўйилди", — дейилади хабарда.
Терговчилар тожикистонликнинг мобил телефонини таҳлил қилиш натижасида эркакнинг италиялик алоқаларини аниқланишни режлаштирмоқда.
"Унинг Римга келиши ташвишли саволларни очиб беради: у бу ерда бирор нарсани режалаштирганми? У илгари кимнидир ёллаганми? Уни кутишганмиди? Унинг фуқаролиги 22 март куни Crocus City Hall теракти билан боғлиқ юқори кескинлик туфайли ҳибсга олинишида асосий омил бўлган. Бироқ ҳозирча унинг ушбу ҳаракатга алоқадорлигини кўрсатадиган ҳеч қандай элементлар йўқ", — дейилади баёнотда.Айни пайтда Тожикистоннинг уни экстрадиция қилиш ҳақидаги илтимоси ҳам кўриб чиқилмоқда. Италия ички ишлар вазири Маттео Пиантедосининг таъкидлашича, ҳибсга олиш “жуда муҳим натижа, террорчилик таҳдидига қарши самарали профилактика фаолияти самарасидир”.
"Бу бошқа мамлакатлар полицияси билан ўзаро манфаатли ҳамкорликнинг тасдиғидир", — дея қўшимча қилди у.
Унинг сўзларига кўра, ўтган йилнинг 7 октябридан буён хавфсизлик нуқтаи назаридан Италиядан 50 дан ортиқ одам чиқариб юборилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Eng qaynoq xabarlar bilan TELEGRAM kanalda birinchilarda xabardor bo'ling.
