Toshkentda koronavirusga chalingan samarqandlik bemor vafot etdi

5389 18-05-2020 0 O'zimizda

 Samarqandlik fuqaro I. (erkak) 14-may kuni og‘ir ahvolda Respublika shoshilinch tibbiy yordam ilmiy markaziga yotqizilgan edi. O‘tkazilgan diagnostik tahlillardan so‘ng bemorda koronavirus infeksiyasi aniqlangan,  deb yozmoqda "Daryo.uz" nashri.

Shundan keyin bemorga ixtisoslashgan tibbiy yordam ko‘rsatish maqsadida Virusologiya ilmiy tekshirish instituti klinikasiga o‘tkazilgan. Bemor uzoq vaqt davomida jigar sirrozi tashxisi bilan davolanib kelgan. Bundan tashqari, unda semizlik, anemiyaning og‘ir darajasi kabi qator hamroh kasalliklar ham mavjud bo‘lgan.

Klinikada bemorga mutaxassislar tomonidan belgilangan standartlar asosida reanimatsion yordam ko‘rsatilgan. Vazirlikning turli yo‘nalishlari bo‘yicha bosh mutaxassislari va Respublika shoshilinch tibbiy yordam ilmiy markazi mutaxassislari tomonidan telemeditsina orqali konsiliumlar ham o‘tkazilib, doimiy nazorat ta’minlangan.

“Biroq ko‘rsatilgan reanimatsion muolajalarga qaramasdan, bemor yurak qon-tomir va o‘tkir nafas yetishmovchiligidan vafot etgan”, — deya xabar bermoqda O‘zbekiston Sog‘liqni saqlash vazirligi 18-may kuni tarqatgan axborotida.

Bungacha

• 27-mart kuni Namangan viloyatida Umradan qaytgan qizidan koronavirus yuqtirib olgan 72 yoshli onaxon miokard infarktidan (uning janozasida qarindoshlaridan hech kim ishtirok etmagan);
• 28-mart kuni Toshkent shahrida o‘zini uyda davolashga uringan 39 yoshli (erkak) shifokor koronavirus infeksiyasidan;
• 7-aprel kuni koronavirusga chalingan 40 yoshli erkak yurak va o‘pka yetishmovchiligidan;
• 11-aprel kuni esa xorij safaridan koronavirusga chalinib qaytgan farg‘onalik 59 yoshli ayol o‘tkir respirator distress sindrom, o‘tkir nafas yetishmovchiligi hamda o‘pka-yurak yetishmovchiligi oqibatida;
• 14-aprel kuni Namangan shahrida yashovchi 73 yoshli Sh. yurak qon-tomir yetishmovchiligidan;
• 18-aprel kuni Toshkent shahrida 77 yoshli ayol koronavirus infeksiyasi asoratlari — ikki tomonlama bronxopnevmoniyaning og‘ir kechishi, o‘tkir nafas yetishmovchiligi va o‘pka shishidan;
• 22-aprel kuni Namangan shahrida yashovchi 54 yoshli bemor (ayol) o‘tkir nafas va yurak qon-tomir yetishmovchiligidan;
• 24-aprel kuni Angrenda koronavirus infeksiyasi tasdiqlangan bemor o‘tkir nafas, o‘pka-yurak va poliorgan yetishmovchiligidan;
• 29-aprel kuni Toshkentda 1959-yilda tug‘ilgan G. ismli bemor o‘tkir respirator distress sindrom, o‘tkir nafas yetishmovchiligi, o‘pka-yurak yetishmovchiligidan;
• 3-may kuni Namanganda M. ismli koronavirus infeksiyasini yuqtirib olgan bemor o‘tkir nafas va yurak qon-tomir yetishmovchiligidan;
• 15-may kuni Samarqandda koronavirusga chalingan O‘. ismli ikkinchi guruh nogironi o‘tkir nafas va yurak qon-tomir yetishmovchiligidan
• 17-may kuni koronavirusga chalingani Surxondaryoda aniqlangan sirdaryolik haydovchi I. yurak qon-tomir va o‘tkir nafas yetishmovchiligidan

vafot etgani ma’lum qilingan edi.

Ma’lumot uchun, 18-may soat 10:00 holatiga ko‘ra O‘zbekistonda koronavirus infeksiyasini yuqtirib olish bilan bog‘liq 2762 ta holat aniqlangan. 18-may soat 15:30 holatiga ko‘ra bemorlarning 2293 nafari sog‘ayib, reabilitatsiyaga kuzatilgan.

Samarqandda yana ko‘p nafar koronavirusga chalingan bemorlar sog‘aydi

Karantin yaqin orada tugamasligi mumkinmi?

Toshkent shahri Uchtepa tumanidagi 62-oilaviy poliklinika nima uchun yopildi?

Bu ka'bi muhim xabar va yangiliklar bilan Telegram kanalimizda  birinchilardan ta'nishib boring!