So'hdagi voqealar yuzasidan Shavkat Mirziyoyev Qirg‘iziston Prezidenti bilan suhbatlashdi...
Prezident Shavkat Mirziyoyev 1-iyun kuni Qirg‘iziston prezidenti So‘ronbay Jeenbekov bilan telefon orqali muloqot qildi, deya xabar bermoqda Prezident matbuot xizmati.
Davlat rahbarlari 31-may kuni “Chashma” chegaraoldi hududida ro‘y bergan hodisa bilan bog‘liq masalalarni batafsil ko‘rib chiqib, bunday vaziyat boshqa takrorlanmasligi uchun mukammal choralar qabul qilish muhim ekanini ta’kidlagan.
“Hukumat delegatsiyalari o‘tkazgan muzokaralarning samarali natijalari mamnuniyat bilan qayd etildi”, — deyiladi Prezident matbuot xizmati axborotida.
Реклама на Unews
Prezidentlarning muloqoti davomida ikki tomonlama munosabatlarga oid mavjud masalalarni tartibga solish hamda amaliy hamkorlikni, avvalo, savdo-iqtisodiy, investitsiyaviy va transport-kommunikatsiya sohalarida yangi o‘sish nuqtalarini aniqlashga qaratilgan sa’y-harakatlarni faollashtirish yuzasidan kelishib olingan.
“Shu munosabat bilan O‘zbekiston va Qirg‘iziston Hukumatlararo qo‘shma komissiyasi hamda Chegaradosh viloyatlar ma’muriyatlari rahbarlari kengashining navbatdagi majlislarini o‘tkazish taklifi qo‘llab-quvvatlandi”, — deya qo‘shimcha qilingan Prezident matbuot xizmati axborotida.
Suhbat chog‘ida koronavirus pandemiyasi tarqalishining oqibatlariga qarshi kurash bo‘yicha yaqindan hamkorlikni va idoralararo almashinuvlarni davom ettirish zarurligi qayd etilgan. Prezidentlar halqaro va mintaqaviy ahamiyatga molik dolzarb masalalar yuzasidan ham fikr almashgan.
Реклама на Unews
“Davlat rahbarlari O‘zbekiston va Qirg‘iziston o‘rtasidagi ko‘p asrlik do‘stlik, yaxshi qo‘shnichilik va strategik sheriklik munosabatlarini qardosh xalqlarimiz farovonligi yo‘lida yanada mustahkamlashda qat’iy ekanliklarini yana bir bor tasdiqladilar”, — deb yakunlangan Prezident matbuot xizmati axboroti.
Eng qaynoq xabarlar bilan TELEGRAM kanalda birinchilarda xabardor bo'ling.
