Ronaldu o‘z rekordini yangiladi
Dam olish kunlari 2024 yilgi Yevropa chempionatining saralash o‘yinlari bo‘lib o‘tdi. Saralashning 2-turi doirasida “J” guruhidan o‘rin olgan Lyuksemburg va Portugaliya termalari kuch sinashdi. To‘liqligicha Portugaliyaning ustunligida o‘tgan bahsda Roberto Martines shogirdlari 6:0 hisobida zafar quchdi.
E’tiborlisi, Portugaliya terma jamoasi safida Krishtianu Ronaldu dubl qayd etdi. Shu tariqa hujumchi terma jamoa safidagi 121 va 122-gollarini kiritib, terma jamoalar safida eng ko‘p gol urish bo‘yicha o‘ziga tegishli rekordni yana 2 ta to‘pga yangilab qo‘ydi.
1-turda Portugaliya o‘z uyida Lixtenshteyn bilan kuch sinashib, 4:0 hisobida zafar quchgandi. O‘sha bahsda ham Ronaldu 2 ta golga mualliflik qilgandi. Lyuksemburgga qarshi bahsdan so‘ng, Ronaldu o‘z Twitter sahifasida ortda qolgan ikki tur haqida fikrlari bilan o‘rtoqlashdi.
Реклама на Unews
“Ikki o‘yin, ikki g‘alaba! Maqsadga erishildi. Jamoamiz saralashni juda ijobiy boshlashiga hissa qo‘shganimdan xursandman. Olg‘a!” deb yozdi hujumchi.
Ikki turdan so‘ng Portugaliya o‘z guruhida 6 ochko bilan peshqadamlik qilmoqda. 1 ta g‘alaba va 1 ta durang natija qayd etgan Slovakiya esa 4 ochko bilan 2-pog‘onani band etib turibdi.
Eng qaynoq xabarlar bilan TELEGRAM kanalda birinchilarda xabardor bo'ling.
